Kryeministri Edi Rama përgjatë një konference për shtyp ka deklaruar se në kuadër të masave për të parandaluar përhapjen e koronavirusit, do të pezullohet transporti urban për Tiranën dhe Durrësin.
Rama i mëshoi faktit se udhëzimet e qeverisë duhet të respektohen dhe ndiqen me përpikmëri nga qytetarët.
“Akti normativ është gati dhe në orët në vijim do formatizohet për të vendosur sanksionet në lidhje me masat dhe jemi munduar të krijojmë një ekuilibër në një kohë aspak të zakonshme.
Kemi vendosur ndalimin e aktivitetit të gjitha bar-eve dhe restoranteve dhe ta shoqërojmë këtë me një sanksion nëse ata tentojnë ta hapin aktivitetin. Megjithatë duhet të falënderoj një pjesë të madhe që janë ndërgjegjësuar vetë dhe e kanë mbyllur aktivitetin.
Do të bëjmë ndalimin e transportit urban në Tiranë dhe Durrës, sepse këto janë qytete më të mëdha dhe me një numër të prekur më lartë në krahasim më vendet e tjera. Asnjë shtet nuk e ndali dot përhapjen e virusit, por ka shumë mundësi se si ndërton sistemin mbrojtës dhe këto masa janë pikërisht për mbrojtjen tonë.
Ajo që u ndodhi vendeve që nuk i morën këto masa në momentin e shpërthimit, të mos na ndodhi ne. Po i marrim që në momentin e shpërthimit këto masa për të frenuar përhapjen, numri i të infektuarve do të rritet dhe mos u çudisni”, pohoi Rama.
Pezullimi i transportit për Tiranën dhe Durrësin, vjen pas urdhrit të qeverisë për të mbyllur lokalet dhe restorantet.
