Kryeministri Edi Rama lidhur me situatën e shkaktuar nga koronavirusi, theksoi se populli duhet të zbatojë me përpikmëri masat.
Përgjatë një interviste për “News24” Rama tha se numrat e të të prekurve nga COVID-19 në Shqipëri do të rriten… sipas tij s’ka si të ndodhë ndryshe.
“Çdo sistem shëndetësor në botë dhe ato më të kuotuarat, italian, gjerman, francez, janë të sfiduara rëndë. Askush nuk ka sigurinë se mund t’ia dalë duke e vendosur sëmundjen përballë vetëm me sistemin. Ndaj të gjithë mes virusit dhe vijës së parë të mbrojtjes kanë vendosur popullin.
Është populli që duhet të garantojë që përmes masave dhe zbatimit të tyre ta bëjë avancimin e virusit shumë më të ngadaltë. Pritshmërinë sa më të ulët që t’i japë mundësi sistemit të kurojë ata që janë më në nevojë.
Kjo është arsyeja që merren masat. Virusi do hapet kudo dhe do bëjë të vetën, por ajo që është e rëndësishme përhapja e virusit me shpejtësi apo me ngadalë. Përhapja me shpejtësi.
Numrat në Shqipëri do të rriten patjetër, s’ka si të ndodhë ndryshe, por duhet të bëjmë çmos të ruajmë një rritje graduale dhe të mos shkojmë në kurbën marramendëse”, deklaroi kryeministri Rama.
