Kryeministri Edi Rama doli pak më parë në një komunikim live me qytetarët.
Ai iu bëri thirrje të mos përhapin panik, teksa paralajmëroi edhe një përkeqësim të situatës me kalimin e ditëve.
Ndër të tjera, kreu i qeverisë iu sugjeroi qytetarëve dy receta se si t’i kalojnë ditët e izolimit brenda në shtëpi, në këto ditë izolimi.
“Po ju tregoj një nga gjërat që po bëj, ushtrime frymëmarrje joga të thjeshta dhe ushqim vetëm brenda 8 orëve, agjërim 16 orë, e kam me provë është super për trupin e mendjen. Më e mira do bëhet me besim e durim”, tha ai.
Në bisedë e sipër, Rama tregoi edhe se ku e ka bërë ai zborin kur ishte i ri, teksa theksoi se kjo jetë e re për shqiptarët nuk është aspak si ato stërvitjet ushtarake gjatë zborit.
“Që ta ndajmë mendje mirë miq, kjo jeta e re që sapo ka nisur s’është si ato stërvitjet ushtarake në kohën e zborit që na zgjonin me sirena në 3 të mëngjesit me alarme false për agresionin anglo amerikan, unë të paktën andej e kam bërë zborin, kodrave të Mamurrasit, për të rrëzuar me karabinat tona avionët bombardues të imperializmit. Jo, jo kjo është një luftë e vërtetë me një armik të vërtetë që ka sulmuar mbarë njerëzimin e ka aftësinë të godasë në mënyrë të frikshme sistemet mbrojtës shëndetësor pa dallim sado i zhvilluar të jetë një vend”, shtoi Rama.
Kujtojmë se pacientë të rinj u konfirmuan sot se janë prekur nga koronavirusi. Deri më tani numri total i personave të prekur nga koronavirusi në vend ka shkuar në 38.
