Sot në ditën Ndërkombëtare të Tokës, Kreu i Shtetit Ilir Meta, ka dalë me një mesazh të fortë. Teksa të gjithë po luftojmë me pandeminë, Meta shkruan se COVID-19 nuk e ndal dot pranverën.
Sipas Presidentit, që të kemi një të ardhme të shëndetshme, pa maska e doreza, duhet ta duam më shumë tokën dhe mjedisin që na rrethon.
“Coronavirusi nuk e ndal dot pranverën! Por për një të ardhme më të shëndetshme, pa maska, doreza dhe ilaçe, duhet ta duam dhe ta mbrojmë më shumë tokën, mjedisin, ekosistemin, biodiversitetin e pasur dhe pyjet e jashtëzakonshme! Uroj që kjo situatë të marrë fund sa më shpejt, për t’ju rikthyer bukurive tona përrallore natyrore! Gëzuar Ditën e Tokës!”.
Nga ana tjetër, Rama ka bërë publike vendimet e reja për lehtësimin e masave të vendosura për shkak të pandemisë së koronavirusit. Kryeministri tha se javën e ardhshme do zgjatet orari për pazar, dhe do hapin rrugët ndërqytetëse për taksitë. Gjatë një komunikimi online ditën e djeshme, shefi i qeverisë deklaroi se nga dita e hënë do të hapet edhe blloku i tretë i bizneseve. Rama theksoi se çdo biznes duhet të respektojë protokollin e sigurisë, për ruajtjen e shëndetit të punonjësve dhe qytetarëve.
Dita e Tokës u shënua në Shtetet e Bashkuara të Amerikës, si një thirrje paqësore për një reformë mjedisore, pas një derdhje masive të naftës në brigjet e Kalifornisë. Gjysmë shekulli më vonë, kjo ditë bashkon miliona njerëz në të gjithë globin, duke tërhequr vëmendjen ndaj sfidave të mëdha me të cilat përballet planeti ynë.
