Kryeministri Edi Rama së fundmi, përmes një postimi në rrjetin social Facebook ka dhënë lajmin e mirë se pacienti zero në Shqipëri sapo ka rezultuar negativ.
“Edhe pacienti zero sapo doli negativ”, shkruan Rama.
Po ashtu ka reaguar edhe Ministrja e Shëndetësisë Ogerta Manastirliu.
“Një tjetër lajm i mirë! Edhe pacienti 0 sapo është konfirmuar negativ. Babë e bir pritet të lënë spitalin dhe bashkë me pacientin tjetër që la spitalin mesditën e sotme, janë 3 pacientët e shëruar që rikthehen në shtëpi”, shkruan ajo.
Sipas Ministrisë së Shëndetësisë dhe Mbrojtjes Sociale numri i të prekurve nga COVID-19 në Shqipëri ka shkuar në 76.
Kujtojmë se ka nisur trajnimi i mjekëve, infermierëve, farmacistëve, ekspertëve të shëndetit publik dhe studentëve të Mjekësisë që i janë përgjigjur thirrjes së Ministrisë së Shëndetësisë dhe Mbrojtjes Sociale për t’ju bashkuar frontit të parë të luftës me COVID-19.
3000 profesionistë të shëndetit publik dhe studentë të mjekësisë i janë përgjigjur thirrjes së MSHMS për të shërbyer në rast nevoje për përballimin e kësaj situate.
Trajnimi i profesionistëve të shëndetit ka nisur në Vlorë dhe Elbasan dhe po kryhet në bashkëpunim të ngushtë mes strukturave të Ministrisë së Shëndetësisë me universitetet rajonale.
Për administrimin e personelit mjekësor, infermieror dhe atyre vullnetar në sistemin shëndetësor për trajtimin e infeksionit të shkaktuar nga COVID – 19, ministrja Manastirliu ka firmosur një urdhër në të cilin është caktuar koordinator përgjegjës prof Arben Gjata.
Ditën e djeshme MSHMS iu bëri apel qytetarëve që mos të shkojnë menjëherë në spital!
“Është vëndosur në dispozicion një linjë të gjelbër falas 0800 40 40 për çdo qytetar që kërkon informacon apo këshilla në lidhje me COVID-19. Kjo linjë do të shërbejë edhe për pacientët kronikë që të marrin informacion se si të lidhen me mjekun e familjes, se si mund të përfitojnë barnat me rimbursim dhe për cdo shqetësim tjetër që ata kanë.
Por është e rëndësishme të sqarohet gjithashtu se: Nëse qytetarët kanë shenja të sëmundjes dhe për rastet e urgjencave duhet të telefonohet tek numri unik i urgjencës kombëtare 127!
MSHMS ju kërkon qytetarëve të respektojnë masat e distancimit social, të qëndrojnë në shtëpi, të ndihmojnë veten e tyre dhe të afërmit e tyre që të mos preken nga COVID-19 dhe të ndihmojnë stafet mjekësor për të përballuar këtë situatë”, thuhej në njoftimin e Ministrisë së Shëndetësisë.
