Ministria e Shëndetësisë njoftoi se deri më tani ka shkuar në 10 numri i të infektuarve me koronavirus në Shqipëri. Qeveri ka marrë masa të rrepta për izolimin e virusit që ka prekur botën.
Pas mbylljes së shkollave dhe disa institucioneve të tjera, për dy javë Këshilli i Lartë Gjyqësor ka urdhëruar pezullimin e veprimtarisë dhe shërbimeve në të gjithë gjykatat në vendin tonë.
Qeveria bllokoi sot udhëtimet nga Italia dhe anasjelltas, duke urdhëruar uljen e avionëve në tokë si edhe futjen e trageteve në porte.
Ministrja e Infrastrukturës, Belinda Balluku, në një konferencë për mediat pas shpalljes së Italisë “zonë e kuqe”, bëri me dije se do anulohen të gjitha udhëtimet drejt Italisë.
“Të gjitha aeroportet, duke u nisur nga Shqipëria, nuk do te jenë më të aksesueshme. Të gjithë pasagjerët kanë kaluar në kontroll mjekësor. Të gjithë personave të sapo ardhur në Shqipëri i kërkohet vetëkarantinimi. Në rastet kur autoritetet italiane do të vendosin të tërheqin shtetas të tyre, do të jenë të mundur vetëm nëse avionët do të jenë pa pasagjerë”, tha Balluku.
Sakaq, qeveria shqiptare ka bërë gati vendimin për t’i dhënë ditë pushimi njërit prej prindërve të punësuar në sektorin publik dhe privat, të cilët kanë fëmijë në çerdhe, parashkollor dhe kopshte. Vendimi i cili parashikon dhënien e pushimit nga data 10 deri në 23 mars është gati, dhe pritet të shpallet gjatë ditës.
