Presidenti Ilir Meta ka folur në lidhje me menaxhimin e situatës në vend, pas situatës së vështirë që ka krijuar përhapja e koronavirusit.
Në një intervistë për emisionin Real Story, në News24, Meta veçoi gjëra të cilat ai i konsideroi më të rëndësishme në gjendjen ku ndodhemi.
Së pari sipas Metës, duhet siguruar mbrojtja e mjekëve dhe e personelit, të cilët ndodhen në vijën e parë. Ndërsa së dyti, kreu i shtetit theksoi se duhet siguruar që të testohen të gjithë ata persona, që japin simptoma apo që kanë qenë në kontakte me personat që kanë rezultuar pozitivë.
Në lidhje me këtë të fundit, Meta deklaroi se janë marrë masat që në të ardhmen e afërt, Shqipëria të ketë mijëra tamponë.
“Më e rëndësishmja dhe sfida që kemi tani është të mbrojmë mjekët dhe personelin shëndetësor, që janë në vijën e parë të kësaj beteje.
Ne jemi në një situatë shumë më të favorshme në aspektin e menaxhimit. Sot morëm sigurimet se masat për mbrojtjen e personelit të vijës së parë janë marrë dhe po mbërrijnë të gjitha.
Shqipëria do ti ketë të gjithë mundësitë e tamponimit. Por dy gjërat më të rëndësishme tani janë:
-Mbrojtja e mjekëve dhe personelit që është në vijën e parë
-Testimi i të gjithë personave që japin simptoma apo që kanë qenë në kontakte me personat që kanë rezultuar pozitivë.
Tamponët ekzistojnë dhe janë marrë masat për të pasur dhjetëra, mijëra tamponë në një të ardhme të afërt”, tha Meta.
