Koronavirusi po prek përditë edhe më shumë njerëz. Deri më tani rreth 135 mijë persona nga e gjithë bota janë infektuar nga virusi vdekjeprurës.
Mirëpo si duket Covid-19 nuk ka kursyer as figurat publike. Pas rastit më të fundit ku aktori i njohur hollivudian Tom Hanks dhe bashkëshortja e tij pranuan se ishin infektuar, raportohen sërish raste të reja në botën e politikës.
Mësohet se pas testeve të kryera ka rezultuar pozitive edhe gruaja e kryeministrit kanadez, Sophie Trudeau.
Gjithashtu ka rezultuar pozitiv edhe ministri i Brendshëm i Australisë, Peter Dutton. Dutton u shfaq të premten në punë me temperaturë të lartë dhe kollë të thatë.
Gjithashtu virusi vdekjeprurës ka prekur edhe figura të sportit. Dje u konfirmua që një basketbollist i Real Madrid ishte pozitiv me koronavirus duke bërë që i gjithë ekipi të karantinohet. Edhe trajneri i Arsenal rezultoi pozitiv me koronavirus.
Kujtojmë se koronavirusi ka marrë 4,990 jetë personash nga e gjithë bota. Zona më e prekur tashmë që po shfaq më shumë raste të reja dhe viktima është Italia.
Më shumë se 100 persona po ndërrojnë jetë çdo ditë në shtetin fqinj, teksa numri total i të vdekurve ka shkuar në 1016.
