Ardhja e koronavirusit në Shqipëri, ka sjellë një sërë masash në vendin tonë për parandalimin e tij. Këtu nuk mund të përjashtohej edhe futbolli.
FSHF ka vendosur që dy ndeshjet e sotme në Kategorinë Superiore, të luhen pa praninë e tifozëve. Ndeshjet do të luhen rregullisht dhe nuk do të pezullohen, por pa praninë e tifozëve. Kjo për shkak të prekjes së dy personave nga koronavirusi.
Njoftimi:
Komiteti i Emergjencës në Federatën Shqiptare të Futbollit është mbledhur ditën e sotme për të vlerësuar situatën pas urdhrit nr. 132, dt. 8/3/2020 të Ministrisë së Shëndetësisë dhe Mbrojtjes Sociale, lidhur me pezullimin e aktiviteteve sportive dhe sociale në vend.
Komiteti i Emergjencës vlerësoi se duke qenë se katër ekipet janë grumbulluar tashmë respektivisht në Shkodër (Vllaznia-Partizani) dhe Korçë (Skënderbeu – Kukësi), të vijojë me zhvillimin e këtyre dy ndeshjeve të javës së 26-të të Kategorisë Superiore, me dyer të mbyllura.
Komiteti i Emergjencës në FSHF, i kërkon Këshillit të Ministrave një takim për të diskutuar në detaje lidhur me vijimësinë e aktiviteteve futbollistike në vend.
