Kryetari i Partisë Demokratike Lulzim Basha përgjatë një bashkëbisedimi me gazetarët i bëri thirrje qeverisë që të marrë masa të menjëhershme për të ndaluar përhapjen e koronavirusit.
Basha tha se prej datës 23 shkurt, PD ka sugjeruar 4 herë në ditë masat që duhen të ndërmerren, mirëpo sipas tij, përgjigja që është marrë nga qeveria ka qenë tallje.
“Prej datës 23 shkurt Partia Demokratike ka sugjeruar 4 herë në ditë masat që duhen të ndërmerren. Opozita ka që prej 23 shkurtit që i drejton thirrje qeverisë për të marrë masa konkrete.
Ditë për ditë…por përgjigja që kemi marrë nga qeveria ka qenë tallje.
Kjo është e pafalshme, por nuk jemi këtu për t’u marrë me pjesën që kanë bërë gabim deri më tani. Ata janë qeveria, ata kanë paratë. Ata kanë në dorë që t’u shërbejnë të infektuarve.
Partia Demokratike këtë detyrën e sugjerimeve, e ka kryer të parën.
Më mirë të vendosen fondet sot në dispozicion, t’u japin pajisjet më të mira të mundshme.
Të marrin masat sipas protokolleve të OBSH-së.
Duhet t’i jepet fund propagandës! I bëj thirrje qeverisë që mos ta marrë këtë mesazh si një sfidë. Sot kemi propozuar sipas ekspertizës tonë më të mirë. Të alokohen fonde për specialistët”, deklaroi Basha.
