Banorët e fshatit Sheqeras në Korçë kanë konstatuar mëngjesin e ditës së sotme hedhjen e një sasie të konsiderueshme mbetje kafshësh në kanalin hyrës të fshatit.
Sipas banorëve, një mjet tip furgon ka shkarkuar thasë me mbetje kafshësh të therura gjatë natës së kaluar, ku vetë banorët kanë zbuluar se thasët janë me mbetje plënci apo pjesë të tjera të pa përdorshme të bagëtive të mëdha.
Këto mbetje kanë shkaktuar shqetësime tek banorët e zonës, të cilët paraqiten të rrezikuar nga përhapja e ndonjë sëmundje.
Ndërkohë, ende nuk janë identifikuar personat që depozituan këto mbetje bagëtish në hyrje të fshatit Sheqeras.
