Policia e Korçës ka vënë në pranga dy persona, një burrë dhe një grua, të kapur në flagrancë si shpërndarës të lëndëve narkotike. Sipas informacionit zyrtar, ky arrestim ishte koduar me emrin “Kamuflimi”.
Sipas bluve, të dy shtetasit e arrestuar bashkëpunonin me njërit-tjetrën dhe shpërndanin heroinë dhe kanabis. Ata vepronin brenda qytetit të Korçës.
“U dokumentua me prova ligjore aktiviteti kriminal i shtetasit R. S. dhe shtetases Zh. G., të cilët në bashkëpunim me njëri-tjetrin shpërndanin sasi me lëndë të dyshuar narkotike të llojit heroinë dhe kanabis, kundrejt pagesës, në qytetin e Korçës”, citohet në deklaratën e policisë.
Në rrjetën e policisë gjatë këtij operacioni janë ndaluar edhe 5 shtetas të tjerë, të cilët dyshohet se janë përdorues dhe klientë të dy të arrestuarve. Atyre u janë gjetur doza të vogla të dyshuara për heroninë dhe kanabis. Policia bën me dije se ata do të gjykohen në gjendje të lirë.
NJOFTIMI
Specialistët e Seksionit për Hetimin e Trafiqeve të Paligjshme dhe Narkotikëve, në Drejtorinë Vendore të Policisë Korçë, në bashkëpunim me Komisariatin e Policisë Korçë dhe Prokurorinë e Rrethit, në vijim të punës për goditjen e paligjshmërisë në fushën e prodhimit dhe shitjes së narkotikëve, kanë finalizuar me sukses operacionin policor të koduar “Kamuflimi”, si rezultat i të cilit u bë kapja dhe arrestimi në flagrancë i shtetasve:
- S., 39 vjeç dhe Zh. G., 34 vjeçe, banues në Korçë.
Si edhe filloi procedimi penal në gjendje të lirë ndaj 5 shtetasve:
- K., 39 vjeç, E. M., 34 vjeç, K. Gj., 24 vjeç, J.M, 37 vjeç, banues në Korçë dhe V. M., 30 vjeç, banues në fshatin Rëmbec, Maliq.
Gjatë zhvillimit të fazave të këtij operacioni, u dokumentua me prova ligjore aktiviteti kriminal i shtetasit R. S. dhe shtetases Zh. G., të cilët në bashkëpunim me njëri-tjetrin shpërndanin sasi me lëndë të dyshuar narkotike të llojit heroinë dhe kanabis, kundrejt pagesës, në qytetin e Korçës.
Ndërsa 5 shtetasit e tjerë, janë kapur në flagrancë nga shërbimet e Policisë, me doza me lëndë të dyshuar narkotike heroinë dhe kanabis, të cilat i kishin blerë tek shtetasit e lartpërmedur.
Gjatë këtij operacioni, u gjetën dhe sekuestruan në cilësinë e provës materiale:
98 doza dhe një sasi prej 309 gr. me lënde të dyshuar narkotike heroinë, një sasi me lëndë të dyshuar narkotike kanabis, pesë kokrra metadon, 365 000 lekë, 60 euro, dy automjete dhe 6 aparate celulare.
Materialet në ngarkim të tyre i kaluan Prokurorisë të Rrethit Gjyqësor Korçë, për veprën penale “Prodhimi dhe shitja e narkotikëve”.
