Meqënëse përmbarimi nuk arriti të ekzekutojë vendimin e gjykatës për lirimin e truallit pranë shkollës “Petro Nini” në kryeqytet, ditën e sotme të dyja palët i janë drejtuar institucioneve.
Pronari i truallit Aleksandër Gavoci i është drejtuar me një padi Prokurorisë së Tiranës, ku kallëzon për shpifje familjen Llapa dhe Dervishaj, të cilët i kanë zaptuar truallin.
Ndërkohë, këto 2 familje i janë drejtuar me një kërkesë Gjykatës së Lartë për të përshpejtuar shqyrtimin e rekursit që i kanë bërë vendimit të Gjykatës së Apelit që njeh si pronar të truallit Aleksandër Gavoci.
Kujtojme se edhe efektivja e “Shqiponjave” Blerta Dervishi është pezulluar nga puna 3 ditë me motivacionin “pengim të veprimeve përmbarimore”, e cila është njëra prej banorëve që penguan ekzekutimin e vendimit këtë të hënë.
Trualli për të cilin po konfrontohen është blerë në vitin 1928 nga Ali Rizai, gjyshi nga nëna i Aleksandër Gavocit dhe është sekuestruar 2 herë nga shteti.
Sekuestrimi i dytë ndodhi në 1949 dhe familja Rizai u internua në Shkodër. Në vitin 1953 në këtë truall u vendosën familjet Llapa dhe Dervishaj. Këto familje, në 1993 privatizuan banesën ku ishin strehuar nga shteti dhe u pajisën me certifikatë pronësie për katin e parë të banimit.
Në vitin 1997 nisi dhe kalvari i gjyqeve mes 2 familjeve dhe trashëgimtarit të pronarit të truallit Aleksandër Gavoci, ku me vendim të formës së prerë gjykata e ka njohur këtë të fundit si pronar.
Alekandër Gavoci ka tentuar të negociojë me familjet Llapaj dhe Dervishi ende pa marrë vendimi formë të prerë. Në vitin 2015 ata kanë lidhur një marrëveshje ku Gavoci premtonte se do ta shfrytëzonte truallin për të ndërtuar një pallat dhe do iu jepte familjeve 230 m 2 hapësira banimi, por, 2 familjet nuk e pranuan këtë marrëveshje duke kërkuar përveç ambienteve të banimit edhe dyqane, dhe për këtë shkak gjyqet vendosën në fund në favor të Gavocit.
