Ministri i Jashtëm, Heiko Maas ka bërë të ditur shifrën që Gjermania ka vendosur të dhurojë për Shqipërinë, pas dëmeve të shkaktuara nga tërmeti.
Gjatë fjalës së tij në Konferencën e Donatorëve, ministri tha se Gjermani do dhurojë 11 milionë euro për rindërtimin në Shqipëri.
Kujtojmë se deri më tani janë bërë publike vetëm donacionet e Gjermanisë, Suedisë, Anglisë dhe Këshillit Evropian.
Konferenca e donatorëve/ Zbulohet sa dhuroi Suedia dhe Anglia për Shqipërinë
Njoftimi i ambasadës gjermane:
Gjermania angazhon 11 milionë euro për rindërtimin +++
Ministri i Jashtëm Federal Heiko Maas deklaroi sot në Konferencën e Donatorëve për Rindërtimin në Shqipëri pas tërmetit të 26 nëntorit 2019:
“Tërmeti i rëndë i nëntorit, që goditi Shqipërinë, mori 51 jetë njerëzish dhe shkaktoi dëme serioze. Gjermania ofroi menjëherë ndihmën e saj nëpërmjet ekspertëve të Agjencisë të Asistencës Teknike. Por tani bëhet fjalë për rindërtimin. Qytetarët në zonat e prekura kanë nevojë për banesa, shkolla dhe kopshte. Gjermania vë në dispozicion për këtë 11 milionë euro. Është një dëshmi e fortë e solidaritetit të BE-së me Shqipërinë fakti që Komisioni Evropian po koordinon asistencën ndërkombëtare të emergjencës dhe ka thirrur për këtë qëllim konferencën e sotme të donatorëve.”
