Pas debateve të shumta, me shumicë të votave sot në Komisionin e Sigurisë është rrëzuar dekreti i kreut të shtetit, Ilir Meta, për kthim në Kuvend të ligjit për “Policinë e Shtetit”. Pro dekretit të kreut të shtetit ka votuar deputeti Myslim Murrizi. Ky i fundit u shpreh se ky ligj vijon njollosjen e policëve.
“E parë në kompleks, i jap të drejtë zyrës juridike të Presidencës, arsyet që mos kalojë në Kuvend. Shtova dhe faktin që ne jemi në prag zgjedhjesh. Për të mos njollosur dhe me të padrejtë, figurën e pjesës së policisë, që po njollosen nga 200-300 veta.
Është njollosur gjithë trupa. Jo vetëm edhe pjesa më e vogël e asaj që quhet formalisht opozitë, që ka braktisur Kuvendin, dhe gjithë ky tension artificial. Do i bënte mirë mazhorancës që të shtyhet ky ligj, të shtohet, apo të lihet, stop pra 25 prillit. Do e ndjeni peshën e këtij ligji nga gjithë pjesa që me apo të padrejtë ka vendosur dorën e policisë në zgjedhje. Nuk di si do ju thotë Rama tani, se në 2017 u tha varni kapelet pas orës 4 e bëni vota për PS, tani do ju thotë mos i varni po merrni e përgjoni. Jam kundër këtij ligji. E di që nuk ju ka ardhur mirë. Keni kartonat deri më 25 prill, më pas shihemi apo nuk shihemi si të vendosë sovrani”, tha Murrizi.
Presidenti Meta ktheu në Kuvend ligjin nr. 133/2020 për “Policinë e Shtetit”, me argumentin se ligji krijon hapësira për të gjurmuar dhe mbikëqyrur çdokënd përgjatë procesit zgjedhor. Sipas tij, policia mund të përdoret në zgjedhjet e ardhshme parlamentare.
“Ligji krijon hapësira për të gjurmuar dhe mbikëqyrur çdokënd përgjatë procesit zgjedhor. Policia e Shtetit mund të keqpërdoret për të survejuar kundërshtarët politik të forcës qeverisëse dhe intimiduar qytetarët apo mbështetësit e tyre”, thuhet në 15 faqet e arsyeve të kthimit të ligjit në Kuvend.
