Kolegji Zgjedhor nuk njeh dekretin e Metës. Trupa e gjyqtarëve e përbërë nga Ridvan Hado, Tomor Skreli, Artur Malaj, Lindita Sinanaj dhe Astrit Kalaja, vendosën rrëzimin e kërkesës së bërë nga Partia Uniteti Kombëtar për çregjistrim nga zgjedhjet, pas çdekretimit nga Meta të datës së zgjedhjeve. Në këto kushte, Kolegji Zgjedhor njeh si datë të vlefshme për zgjedhjet vendore 30 qershorin.
Kryetari i Partisë Agrare Ambientaliste, Agron Duka, njëkohësisht aleati i kreut të opozitës Lulzim Basha, ka reaguar për vendimin e Kolegjit Zgjedhor. Ai thotë hapur se nuk është surprizuar nga vendimi, ndërkohë që pretendon se të dielën në Shqipëri do të votohet si në Korenë e Veriut.
“Asnjë surprizë nga Kolegji Zgjedhor, të dielën Shqipëria do të votojë ashtu siç votohet në Korenë e Veriut!”, shkruan ai bashkëngjitur fotos në fjalë.
