Alban Semaku, 38-vjeç, i njohur për drejtësinë shqiptare, është ekzekutuar dhe më pas trupi i tij është hedhur në lumin Shkumbin. I ndjeri rezulton i dënuar me herët për disa vepra penale, pasi ka qenë pjesë e “Bandës së Lushnjes”.
Semaku, i cili deri në vitin 2011 mbante emrin Elton Mermali, u gjet i ekzekutuar me armë zjarri, ndërsa trupi ishte hedhur në një zonë ku banorët derdhnin mbeturina. Ai dyshohet të jetë vrarë mbrëmjen e së shtunës.
Ka dyshime se Semaku është ekzekutuar diku tjetër, dhe se më pas trupi u soll në vendin ku edhe u gjet. “Në vijim të veprimeve hetimore të kryera nga grupi hetimor, nën drejtimin e Prokurorisë së Rrethit Gjyqësor Elbasan, për verifikimin e identitetit të shtetasit të vrarë me armë zjarri, i cili është gjetur në afërsi të lumit Shkumbin, në lagjen Çezmë, Peqin, pas verifikimeve të kryera, rezultoi se ishte shtetasi Alban Semaku, 38 vjeç, banues në Lushnjë, i cili deri në vitin 2011 mbante emrin Elton Mermali”, njofton policia.
Në trupin e anëtarit të bandës së Lushnjes janë gjetur katër predha plumbash, një në kokë dhe tre në shpinë. Dyshohet se 38-vjeçari është qëlluar me një pistoletë të kalibrit 9mm. 38-vjeçari ka marrë një plumb nga pjesa e pasme e kokës, që më pas i ka dalë nga syri i djathtë. Ndërkohë që kokën ia kishin mbështjellë me një qese të zezë. Paraprakisht dyshohet se viktima ishte marrë peng, torturuar, vrarë dhe më pas hedhur pranë lumit.
