Drejtësia ka ‘goditur’ një rrjet trafikantësh kokaine që operonin në Gjermani-Zvicër. Ndriçim Harka, punonjësi i zjarrfikëses së Bashkisë Tiranës është ‘koka’ e grupit që operonin në Gjermani dhe Zvicër. Ndaj grupit të goditur rëndojnë akuzat e “shpërdorimit të detyrës”, “trafikimit të narkotikëve” si dhe “pastrimit të parave”.
Shtatë persona, mes tyre dhe Harka janë vënë në pranga, pasi akuzohen se bashkëpunonin në transportimin e kokainës me makina nga Gjermania në drejtim të Zvicrës. Hetimi për këtë grup ka nisur që nga viti 2015.
Shtatë persona janë vënë në prangat e Policisë së Shtetit me urdhër të Prokurorisë së Tiranës, për shkak se akuzohen për “trafik kokaine” nga Shqipëria në Zvicër. Burimet bëjnë me dije se dy persona janë arrestuar në vendin tonë, ndërsa pesë të tjerë kanë rënë në prangat e policisë zviceriane.
Burime jo zyrtare nga grupi hetimor bëjnë me dije se drejtuesit e grupit rekrutojnë shtetas shqiptarë dhe i dërgojnë në Zvicër, për shpërndarjen e kokainës. Në sajë të këtij operacioni janë kapur 3 kg kokainë dhe një sasi parash. Personat që rekrutoheshin për të shitur kokainë në Zvicër paguheshin nga 3500 euro.
