Organizata kriminale në Breshia që trafikonte marijuanë nga Shqipëria dhe kokainë nga Holanda, drejtohej nga një shqiptar.
Neroid Shuhani, 38 vjeç është kreu i kësaj organizate, ndërsa krahu i tij i djathtë është një grua italiane, 51-vjeçarja Daniela Boniotti.
Po ashtu, pjesë e kësaj organizate të trafikut ndërkombëtar janë edhe 11 shqiptarë, mes të cilëve vëllai i drejtuesit Luan Shuhani dhe nipi i tyre, Robert Kasemi.
Prokuroria e Breshias lëshoi 20 urdhër-arreste pas disa muajsh hetime, prej të cilëve 16 janë kryer, ndërsa 4 persona ende nuk janë arrestuar.
Mësohet se pjesë e këtij grupi kriminal janë tetë italianë dhe dymbëdhjetë shqiptarë, të gjithë kryenin veprimtarinë në krahinën e Brescia. Grupi kriminal importonte lëndë narkotike si marijuana dhe kokaina nga Holanda dhe Shqipëria përmes kanaleve të ndryshme dhe mekanizmave të panjohura.
Kokaina sigurohej nga Holanda, ndërsa marijuana nga Shqipëria përmes udhëtimit ujor.
Të arrestuarit janë të gjithë të akuzuar për trafikim të drogës dhe rrezikojnë të paktën 10 vite burg.
