Kryedemokrati Basha ka përshëndetur vendimin e ndërmarrë nga ana e Bankës së Shqipërisë, për pezullimin e pagesës së kredive, teksa vendi është përfshirë nga koronavirusi. Me anë të një statusi në Facebook, kreu i PD-së, Basha, thekson se situata emergjente kërkon masa emergjente.
Statusi
Përshëndes Bankën e Shqipërisë për vendimin e pezullimit të pagesës së kredive, që është një nga masat e propozuara nga PD. Është e domosdoshme në këtë situatë të jemi pranë qytetarëve, operatorëve ekonomikë e sidomos biznesit të vogël! Situata emergjente kërkon masa emergjente!
Ftoj qeverinë që në këtë kohë krize të mos ketë asnjë kompleks të zbatimit të masave ekonomike dhe sociale të propozuara nga PD, por të veprojë pa humbur kohë dhe të adoptojë këto masa për hir të të gjithë shqiptarëve. Koha nuk pret!
Ministria e Shëndetësisë njoftoi se ka shkuar në 23 numri i të prekurve me COVID-19 në Shqipëri. Janë 8 raste të reja të konfirmuara sipas MSH, nga të cilat, 3 në Tiranë, 2 në Durrës, ndërkohë që harta e qyteteve të prekura zgjerohet me 2 në Elbasan dhe 1 në Rrogozhinë.
MSH sqaron se 5 nga të prekurit janë në Spitalin Infektiv, ndërsa pjesa tjetër ndodhen në shtëpi. Qeveria ka marrë një sërë marash shtrënguese kundër koronavirusit, duke mbyllur shkollat e universitetet, pube-t, palestrat dhe ka ndaluar të gjitha grumbullimet masive si konferenca, aktivitete sportive e kulturore.
