Nisur nga deklarata e djeshme e kryeministrit Rama për mundësinë e një marrëveshje të re me LSI-në, kryetarja e LSI Monika Kryemadhi thotë se nuk i frikësohet aspak një marrëveshje Rama-Meta.
E ftuar në emisionin “Pasdite me Xhaxhiun”, Kryemadhi tha se nuk e shqetësonte deklarata e Ramës, sepse sipas saj, kryeministri ka thënë shumë herë “kurrë-kurrë”. Për kryetaren e LSI, deklarata e Ramës është bërë për të tërhequr vëmendjen nga varfëria që ka kapur shqiptarët.
“Nuk më shqetëson fare. Atë e kam thënë, e them dhe do ta them, çdo situatë që Rama mundohet ta shprehi e bën për të larguar vëmendjen nga varfëia që ka kapur shqiptarët dhe po u merr frymën. Kjo është. Nuk më shqetëson mua fare “kurra” e Ramës. Ai ka thënë kurrë-kurrë, por unë se kam besuar dhe as e besoj.
Ai s’ka qenë asnjëherë partneri im politik kur kam drejtuar institucionet. Partenerë për mua janë të gjithë ata që duan të jetojnë dhe të punojnë në Shqipëri”, tha kryetarja e LSI Monika Kryemadhi.
Kryeministri Edi Rama në një komunikim live me gazetarët, ka përjashtuar mundësinë që PS të shkojë në koalicion me LSI në zgjedhjet e 2021.
”Në politikë kurrë mos thuaj kurrë. Por nuk shoh një koalicion me partisë e Presidentit. Sepse konteksti i sotëm, degradimi i vazhdueshëm i asaj force politike dhe detyrimet tona programore ashtu si dhe bindja jonë që është e mjaftueshme të flasë puna. Dhe falë punës një aleancë me popullin na e bëjnë krejtësisht pa interes këtë perspektivë. E përjashtoj”, tha Rama.
