Gazetarja Klodiana Lala tha se kryeprokurorja Arta Marku, parapëlqen që të mos hetojë çështjet e mëdha. Moderatori i emisionit “A Krasta”, Adi Krasta, e pyeti nëse është normale që pikërisht sot në ditën e përgjimeve të reja të “Bild”, ajo të zhduket?!
Gazetarja ia ktheu me ironi, se ajo nuk mund të përballojë dot situata të tilla. Klodiana Lala, nga informacionet që dispononte, tha se Marku ka marrë ndihmë mjekësore, ndaj duhet respektuar. Ajo shtoi më tej se Arta Marku nuk ka dhënë ndonjë shenjë se një rast i bujshëm është hetuar.
“Zonja Marku nuk është gazetare që të përballojë të tilla situata. Për sot ajo pretendon se ka marrë ndihmë mjekësore, e duhet respektuar. Duke parë ecurinë e saj në Prokurori, është një prokurore pa bilanc. Në rastet më me bujë, ajo ka ndikuar që të mos hetohen.
Ka një vit e gjysmë në krye të detyrës, e deri më tani nuk kemi asnjë zyrtar të lartë të hetuar dhe të dërguar prapa hekurave. Ajo është me zero bilanc”, tha Lala.
