Sot besimtarët katolikë festojnë Pashkët. Pashkët kremtohen për të përkujtuar ringjalljen e Jezu Krishtit. Mesha e Pashkëve u mbajt dje në të gjithë botën, e si rrallë herë, pa pjesëmarrjen e besimtarëve.
Kjo për shkak të masave strikte të ndërmarra nga qeveritë për frenimin e koronavirusit. Duke iu referuar shkencëtarëve, vaksina e parë mund të jetë e disponueshme pas afro një viti. E ndërsa kërkimet për të vijojnë.
Mesazhet e urimit nga klasa politike:
Kryeministri Edi Rama ka uruar të gjithë besimtarët katolikë për Pashkën, e cila këtë vit po festohen ndryshe nga herët e tjera, pasi qytetarët janë të izoluar në banesat e tyre.
Rama ka publikuar në Facebook, një video ku shfaqen momente nga festimi i Pashkëve në familjet shqiptare.
Kreu i Partisë Demoraktike, Lulzim Basha ka uruar besimtarët katolikë për Pashkët. Në një postim në Facebook, kryedemokrati është shprehur se këtë kohë pandemie duhet ta kalojmë me kurajo. Kryedemokrati çon një urim dhe një lutje speciale për personat që po përballen me virusin Covid-19.
Edhe Presidenti Ilir Meta ka zgjedhur rrjetet sociale për të uruar besimtarët. Kreu i Shtetit shkruan në postimin e tij në Facebook se sot Pashkët po i kremtojmë me “dyer të mbyllura” për shkak të pandemisë, që po shkakton shumë dhimbje, varfëri dhe frikë. Ndaj më shumë se kurrë, të gjithë kemi nevojë të ndjejmë thellë në shpirt e në zemrat tona mesazhin e Krishtit të Ringjallur, i cili na porosit: “Unë jam i Gjallë në mesin Tuaj, prandaj MOS KINI FRIKË”.
