Presidenti gjerman Frank-Walter Steinmeier, i cili nuk i është drejtuar popullit me një fjalim as kur ra Muri i Berlinit, së fundmi iu ka përcjellë një mesazh qytetarëve lidhur me koronavirusin.
Gjatë fjalimit të tij të rrallë, Steinmeier, ndryshe nga shumë politikanë, deklaroi se kjo pandemi nuk është kurrsesi një luftë.
“Jo, kjo pandemi nuk është luftë. Kombet nuk luftojnë kundër kombeve dhe as ushtarët kundër ushtarëve. Përkundrazi, është një sprovë për njerëzimin. Ajo nxjerr më të mirën dhe më të keqen tek njerëzit.
Le t’i tregojmë njëri-tjetrit më të mirat. T’ia tregojmë Europës. Gjermania nuk mund të dalë nga kjo krizë e fortë dhe e shëndetshme nëse fqinjët tanë nuk janë të fortë dhe të shëndetshëm”, u shpreh ai.
Po ashtu Presidenti gjerman bëri thirrje për solidaritet:
“Ne nuk duam të bëhemi një shoqëri nën ankth dhe mosbesim. Ne mund të jemi një shoqëri me më shumë besim, më shumë konsideratë dhe me shumë vetëbesim”.
