Nga: Mentor Kikia
Përgjimet e bëra publike dje, lidhur me zgjedhjet në Dibër, përtej maskaradës elektorale, tregojnë maskaradën e sjelljes së politikës me arsimin. Një horr, me mandat politik, vë përpara në rresht të gjithë mësuesit e një qarku. I urdhëron të deklarojnë votën, të marrin familjet e tyre e të bëjnë të njëjtën gjë.
I kërcënon me përjashtim nga puna, e madje se do të shkojnë edhe në “p… të nënës”, nëse nuk binden. Epiqendra e gjithë skandalit është për fat të keq një drejtor arsimi, një mësues. Ai u bindet verbërisht urdhrave. I telefonon njëri pas tjetrit drejtorët e shkollave, dhe i përsërit si një papagall kërcënimin. Pastaj drejtorët e shkollave marrin mësuesit, prindërit e nxënësve, ish nxënësit…
Atë horrin që kërcënon zyrtarët lokalë “e kuptoj”. Por drejtorin e arsimit kurrë. Një mësues, që shndërrohet në vegël kundër kolegëve të tij. Nuk janë rastësi këto që ndodhin në shoqërinë tonë. Njerëz pa pikë integriteti, për një karrige shndërrohen në servilë ordinerë, në palaço, në vegla të ndyra që kërcënojnë me vendin e punës kolegët e tyre. Ai drejtor arsimi duhej të kishte kurajën e të thoshte: Jo, unë nuk i kërcënoj mësuesit. Merreni çelësin e zyrës! Paçka se ne fund e shkarkuan pasi e perdoren.
Mos u habisni. Nuk është hera e parë. Arsimi shqiptar u shkatërrua pikërisht nga dhuna verbale e politikës ndaj mësuesve. Drejtuesit e arsimit në çdo qytet kanë qenë vazhdimisht vegla të partive, dhe përmes kërcënimeve i ngarkonin mësuesit si delet në autobusë për të mbushur mitingjet e partive.
Emërime dhe shkarkime vetëm sipas listave të partive, e bënë shkollën nga një institucion arsimi në një magazinë shumice votash, ku mësuesit duhet të garantonin edhe votën e prindërve të nxënësve. Sot ne kemi një nivel mjeran të cilësisë së mësimdhënies, pasi drejtorët e shkollave detyrë parësore kanë votat dhe jo menaxhimin e shkollës.
Ndaj ajo që ne dëgjuam për Dibrën, por që ka ndodhur në çdo Bashki e çdo fshat, në çdo proces zgjedhor, është më shumë se një maskaradë elektorale. Eshtë maskarada mbi shkollën dhe sistemin arsimor, pasojat e degradimit të të cilit do ti vuajmë për dekada.
