66 shqiptarë të mbetur në Gjermani janë kthyer sot në atdhe në kuadër të operacionit humanitar të riatdhesimit të shqiptarëve që janë bllokuar në vendet evropiane për shkak të koronavirusit.
Pasagjerët janë transportuar me avionin e emëruar “Lasgushi” të linjës Air Albania. Ata iu janë nënshtruar kontrolleve të rrepta mjekësore të autoriteteve në aeroportin Nënë Tereza, në Rinas.
Të gjithë ata që janë kthyer do të duhet të qëndrojnë 14 ditë në vetëkarantinim. Emrat e tyre do t’i dërgohen policisë për të kontrolluar nëse ata e zbatojnë karantinën apo jo.
Të riatdhesuarit do të kthehen në shtëpitë e tyre nga familjarët të cilët kanë marrë autorizim nga policia e shtetit për të lëvizur me automjet përtej orarit të lejuar 13:00, e po ashtu edhe për të udhëtuar në akset ndërqytetëse.
