36 shqiptarë janë rikthyer sërish në Shqipëri, pasi iu është refuzuar dhënia e azilit apo kanë shkelur rregullat e qëndrimit në vendet e BE-se. Shtetasit e riatdhesuar kishin kërkuar azil në Francë dhe Belgjikë.
Operacioni u zhvillua ditën e djeshme dhe ishte i organizuar nga Franca në bashkëpunim me Frontex-in, dhe me mbështetjen e eskortës së Policisë Kufitare shqiptare
Sakaq, Ministria e Brendshme dhe Policia e Shtetit i bëjnë thirrje shtetasve shqiptarë që të respektojnë rregullat e lëvizjes dhe të qëndrimit në hapësirën Schengen.
“Gjatë këtij operacioni janë riatdhesuar 36 shtetas shqiptarë, të cilët kishin shkelur rregullat e qëndrimit në vendet e BE-së, apo u është refuzuar dhënia e azilit, nga këta: 31 nga Franca dhe 5 nga Belgjika.
Ndërkohë Policia Kufitare ka forcuar kontrollet në pikat e kalimit kufitar, në drejtim të verifikimit të dokumentacionit dhe plotësimit të kushteve për të udhëtuar në vendet e BE-së, si dhe ka shtuar patrullat në kufirin jeshil për të parandaluar kalimin e paligjshëm të kufirit”, thuhet në njoftimin e policisë mes të tjerash.
Operacionet e riatdhesimit do të vijojnë edhe në javët e ardhshme.
