Një program që tenton të zbuloje emocionet tek njerëzit nëpërmjet njohjes së fytyrës është testuar tek ujgurët në Kinë. Duke iu referuar burimeve, BBC shkruan se sistemi i ri përdor kamerën dhe njihet si ”AI”.
Një inxhinier softuer pretendoi të ketë instaluar sisteme të tilla në stacionet e policisë në provincë, megjithëse një avokat i të drejtave të njeriut të cilit iu treguan provat, e përshkroi atë si tronditëse.
Inxhinieri i softuerit pranoi të flasë me programin ”Panorama” të BBC-së nën kushtet e anonimatit, sepse ai ka frikë për sigurinë e tij. Kompania për të cilën ai ka punuar gjithashtu nuk po zbulohet.
Sipas inxhinierit, kamerat që zbulojnë emocionet janë njësoj si sistemet e mëparshme që zbulojnë kur një njeri gënjen apo thotë të vërtetën, por këtë herë shumë e përparuar.
Qeveria e Kinës ka thënë se mbikëqyrja e ujgurëve është e nevojshme, pasi ata kërkojnë të krijojnë shtetin e tyre dhe i akuzon për vrasjen e qindra njerëzve në sulme terroriste.
