Kina ka miratuar një ligj arsimor që synon të zvogëlojë presionin e detyrave të tepërta të shtëpisë dhe mësimit intensiv pas shkollës, thonë mediat shtetërore. Prindërve u kërkohet të sigurojnë që fëmijët e tyre të kenë kohë të arsyeshme për pushim, stërvitje dhe të mos kalojnë shumë kohë në internet.
Në muajin gusht, Kina ndaloi provimet me shkrim për fëmijët gjashtë dhe shtatë vjeç. Zyrtarët paralajmëruan në atë kohë se shëndeti fizik dhe mendor i nxënësve po dëmtohej.
Vitin e fundit shteti ka prezantuar gjithashtu një sërë masash, që synojnë zbutjen e “varësisë” së fëmijëve nga interneti dhe kultura popullore. Masa e fundit u miratua të shtunën nga Komiteti i Përhershëm i Kongresit Popullor Kombëtar, organi i përhershëm legjislativ i vendit.
Detajet e plota të ligjit nuk janë publikuar ende, por raportet e mediave sugjerojnë se ai inkurajon prindërit të ushqejnë moralin, zhvillimin intelektual dhe zakonet sociale të fëmijëve të tyre.
Pushteti vendor do të jetë përgjegjës për zbatimin, si sigurimi i fondeve për “pasurimin e aktiviteteve jashtë-kurrikulare”.
Burimi i lajmit: BBC. Përshtatur nga Tirana Today
