Kina që dikur ishte epiqendra e koronavirusit, tashmë ia ka dalë mbanë duke ia hedhur paq në këtë pandemi. Tashmë që vala e të prekurve dhe viktimave ka kaluar anembanë botës, Kina po jep kontributin e saj me pajisjet mjekësore.
Për të tretën ditë radhazi, Kina nuk ka shënuar asnjë rast të ri me koronavirus, madje as në Wuhan, vendin e shpërthimit të pandemisë. Në të dhënat e reja, Komisioni Kombëtar i Shëndetit (NHC) përmend vetëm 41 raste të importuara nga jashtë. Asnjë nga të infektuarit nuk është shtetas kinez, por janë të ardhur nga vendet e tjera.
Së fundmi, Kina ka vendosur që të ndihmojë Greqinë. Në aeroportin e ‘Eleftherios Venizelos’ në Athinë ka mbërritur aeroplani ‘Air China’ me 550.000 maska, për të ndihmuar të prekurit nga virusi vdekjeprurës.
Duke iu referuar mediave greke, ndihmat që mbërritën në Athinë nga Pekini peshonin rreth 8 ton, ku ishin përfshirë 550.000 maska, veshje mbrojtëse, doreza dhe mbulesa këpucësh.
