Kina ka të ngjarë të dalë nga kjo krizë në një pozitë më të fortë, ndërsa SHBA-ja në një pozitë më të dobët. Kjo gjë mund t’i shtyjë SHBA-në dhe Kinën akoma më thellë në një Luftë të Ftohtë mes tyre.
Pandemia e koronavirusit, po ndryshon shumë më tepër sesa thjesht mënyrën se si po jetojmë. Ajo po e ndryshon gjithashtu edhe balancën globale të pushtetit. Ndërsa pjesa tjetër e botës është ende në krizë, Kina e ka vënë tashmë nën kontroll virusin. Ose të paktën kështu pretendon. Ndërsa thekson se është në rrugën e rimëkëmbjes ekonomike. Dhe kur Perëndimi të dalë nga kriza, Kina mund të zërë një pozitë të re në skenën ndërkombëtare. Ky vend e sheh tashmë veten në një situatë unike.
Ai mund të rinisë rritjen e vet ekonomike, të ndërmarrë reforma në vend. Por të ofrojë gjithashtu edhe ndihmë për vendet e tjera që janë prekur nga pandemia. Kjo pandemi është shndërruar në një mundësi të madhe gjeopolitike për Kinën, ku ajo mund të bëhet lidere e botës në aspektin e qeverisjes globale.
Dhe ky është ndoshta momenti i Kinës. Ndërkohë parulla e SHBA është “Amerika e Para”. Donald Trump anuloi fluturimet ndërkombëtare nga Europa, pa asnjë paralajmërim paraprak për zyrtarët evropianë.
Ai nisi t’i referohej Covid-19 si “virusi kinez”, në një përpjekje për ta përqendruar fajin e pandemisë tek qeveria kineze. Bashkëpunimi ndërkombëtar, nuk ka qenë për momentin shumë i mirë. Ka pasur një dështim të udhëheqjes globale, veçanërisht nga SHBA.
Për këtë arsye, Kina e sheh këtë krizë si një mundësi për të mbushur disa nga boshllëqet e krijuara. Reputacioni i SHBA, se ka kompetencë që ta përballojë këtë krizë, është rrënuar tërësisht. Së dyti kemi një fragmentim të madh brenda aleancës perëndimore. Mendoj se kinezët janë të etur që të përfitojnë nga dobësimi i aleancës perëndimore. Dhe unë mendoj se kjo krizë do të jetë në dobi të Kinës. Për këtë gjë nuk ka diskutim.
TIRANA TODAY
