Italia po njeh disa nga ditët më të zeza në historinë e saj, teksa çdo ditë qindra njerëz humbin jetën nga koronavirusi.
Në të gjithë Evropën janë mbyllur thuajse të gjitha udhëtimet, teksa shumë shtetas kanë mbetur të izoluar në vende të tjera, larg vendit të origjinës.
I tillë është edhe rasti i italianëve në vendin tonë, të cilët në këto kohë krize nuk janë kthyer në vendin e tyre.
Konsullata Italiane e Gjirokastrës ka qenë gjatë gjithë këtyre ditëve në komunikim të vazhdueshëm me partnerët italianë të rajonit jugor.
Konsulli italian i nderit në Gjirokastër, Teodor Bilushi thotë se shërbimet diplomatike italiane po mbajnë kontakte të vazhdueshme me shtetasit italianë. Por në ndryshim nga shumë raste kur është kërkuar riatdhesimi në Shqipëri, italianët janë ndier më të sigurt dhe ata janë duke zbatuar rregullat e vendosura nga qeveria shqiptare.
“Ka disa familje italiane në Jug të Shqipërisë, 6 të tilla janë në Sarandë. Unë mbaj kontakte të vazhdueshme me ta dhe të gjithë do të qëndrojnë këtu sepse ndihen më të sigurt. Italianët që gjenden në jug janë kryesisht të moshuar. Ata mbajnë kontakte të përditshme me familjet e tyre por deri tani nuk kanë kërkuar të riatdhesohen, jo përpara se situata të përmirësohet.
Ne e përshëndesim solidarizimin e gjerë që kanë treguar qytetarët, shoqatat dhe institucionet vendore në Gjirokastër dhe qytete të tjera të jugut. Kemi parë flamurin italian të valëvitet nga kalaja e Gjirokastrës, me qindra statuse mbështetëse nga qytetarë të thjeshtë dhe kjo është një periudhë që Italia do ta kujtojë gjatë”, tha ai.
