Babai i 25-vjeçarit Klodian Rasha që u ekzekutua afër banesës së tij në kryeqytet, ka dhënë disa deklarata të cilat mund të ndryshojnë rrjedhën e ngjarjes. Qazim Rasha, në një intervistë për emisionin “Opinion”, ka treguar disa detaje të cilat dëshmojnë se polici jo vetëm e ka gjurmuar por edhe e ka dhunuar 25- vjeçarin.
Ai rrëfen se djali i tij së shpejti do të martohej, ndërsa kërkon me dëshpërim zbardhjen e çështjes. “Fatkeqësi e imja, mos i ndodhtë askujt. Çfarë mund të thotë një baba për një djalë 25-vjeçar, që kishte dalë të marrë një paketë cigare. E të iki se nuk ka maskë dhe të masakrohet nga policia.
Edhe kriminel të ishte. Mund ta arrestosh, ai ishte te dera e shtëpisë. Edhe nëse kishte bërë faj, mund të kishte bërë gjithçka, mund ta kapte policia ta arrestonte, ta burgoste, të bënte çfarë të donte, nëse kishte bërë faj. Por, ta masakrojë policia një fëmijë 25-vjeç, kur unë e kisha për ta martuar”, është shprehur Qazim Rasha.
Ai tregon më tej se ka dëshmitarë që e kanë parë duke u zënë me policin, i cili sipas tij, e ka dhunuar. Sipas tij, 25-vjeçari kishte dalë për të konsumuar një kafe, dhe ishte nisur për të ardhur në shtëpi. Kur ka parë policin, është munduar ti shmangë pasi ka qenë pa maskë.
“Ke dëshmitarë që e kanë parë skenën, duke u zënë me policin, duke e gjurmuar dhe duke e rrahur aty në rrugë. Ai ka dalë të pinte një kafe dhe ka ardhur për te shtëpia. Kur ka parë policin, ishte pa maskë dhe ata e kanë gjurmuar. Nëse ka shtet, nëse funksionon ligji, nëse ai ka qenë me armë, unë e pushkatoj.
Nëse djali ka qenë duke ikur për një maskë dhe të masakrohet fëmija në derë të shtëpisë në lagje… Këtë edhe serbi nuk ta bën, nëse shkon dhe kalon matanë të kap dhe të arreston”, shprehet babai i 25- vjeçarit.
Sa i takon precedentëve të mëparshëm penalë të tij, ai thotë se kjo bëhet nga policia për të maskuar punët e veta. “E bëjnë për të maskuar ato punët e veta, nëse ekziston një nga ato, unë varem këtu. Po nuk kanë lidhje fare, këto janë budallaqe. Më tha vetë shefi që ata e kanë bërë, por ata janë maskarenj që kanë bërë veprimin. Të zbardhet e vërteta, ndryshe pastaj nuk mund të…”.
