Përfaqësuesja e opozitës parlamentare në Këshillin Politik, Rudina Hajdari është shprehur se pika për të cilën palët nuk bien dakord është ajo e administratës zgjedhore.
E ftuar në emisionin “Opinion”, Hajdari tha se palët kanë rënë dakord sa i përket identifikimit biometrik. Deputetja tha se tashmë identifikimi biometrik do të kryhet në të gjithë vendin.
“Identifikimi biometrik do të bëhet në të gjithë vendin. Po, kanë rënë dakord. Ka pasur dakordësi, ka pasur zhvillime, palët kanë lëvizur. Administrata zgjedhore është një çështje e rëndësishme dhe palët nuk kanë lëvizur”, tha ajo.
Më tej, Hajdari sqaroi se kërkesa e opozitës për qeveri kujdestare 100 ditë para zgjedhjeve nuk është më në tryezën e Reformës Zgjedhore.
Nesër pritet të mbahet sërish një mbledhje mes Këshillit Politik dhe ambasadorëve të SHBA, BE dhe Britanisë.
