Gjykata për Krime të Rënda i ka dhënë një afat dyjavor Prokurorisë që të vërtetojë vdekjen e Admir Muratajt, grabitësi i Rinasit që u qëllua nga policia.
Gjykata kërkoi në seancën e sotme që përpos certifikatës së vdekjes, Prokuroria të paraqesë edhe prova të tjera, si akt ekspertime të vendit të ngjarjes dhe viktimës.
Seanca e radhës do të mbahet në 2 maj ora 9:00. Murataj mbeti i vrarë pasditen e 9 prillit, pas grabitjes së miliona eurove brenda aeroportit të Rinasit, ndërsa ishte në kërkim si organizatori i 3 grabitjeve me blinda në harkun kohor të 2015-2017.
