Tre persona janë arrestuar në flagrancë pasi kanosën punonjësit e policisë të burgut në Fushë-Krujë.
Policia ka vënë në pranga 25-vjeçarin me iniciale B.Sh., 39-vjeçarin A. Sh. dhe 24-vjeçarin E.Sh, të tre banues në Nikël të Krujës.
Raportohet se 39-vjeçari me iniciale A. Sh., ishte dënuar më parë me 15 vjet burg për veprën penale “Vjedhja me armë”.
Ndërsa 24-vjeçari E. Sh., aktualisht është i dënuar për veprën penale “Prodhim dhe shitja e narkotikëve” dhe për shkak të situatës së COVID-19, i është caktuar të qëndrojë në banesë. Por, i riu ka thyer masën e sigurisë për të ndihmuar kushërinjtë që t’i arratisen policisë.
Bëhet me dije se dy kushërinjtë B.Sh., dhe A.SH., kanë kanosur për shkak të detyrës, për motive të dobëta specialistin e informacionit dhe rojen e burgut të Fushë Krujës, ndërsa shtetasi E.Sh., pasi ishte larguar nga banesa ku duhet të qëndronte u ka shkuar në ndihmë dy kushërinjve dhe i ka transportuar me makinë për t’i shpëtuar kapjes së policisë.
Materialet i kaluan Prokurorisë së Rrethit Krujë për veprat penale “Kanosja për shkak të detyrës” kryer në bashkëpunim dhe “Largimi i të burgosurit nga vendi i qëndrimit”.
