Kryetarja e LSI-së, Monika Kryemadhi u shpreh se me paketën “Antishpifje” do të ketë një AMA si hetuesi dhe një AKEP si xhelat.
E pranishme në mbledhjen e opozitës me gazetarët, Kryemadhi tha se e gjitha kjo është një strategji e kryeministrit Rama për të fituar pak më shumë kohë.
Sipas saj, Rama do që të shtyjë gjendjen e jashtëzakonshme në vend, që të mos ketë një zgjidhje për krizën politike.
“Ne si opozitë kemi marrë një vendim largimin nga parlamenti, vetëm një veprim i tillë i opozitës do të shfaqje figurën e vërtetë të një artisti që në thelb ka censurën. Do të kemi një AMA si një hetuesi dhe një AKEP si xhelat. Strategjia e shpopullimit është e Ramës ku po ikën klasa e mesme, biznesi, gazetarët, opinionistët sepse kanë sigurinë e shëndetësisë për fëmijët etj, e më pas do të sjellë censurën.
Të mbyllësh gojën e gazetarëve është shkelje e të drejtave të njeriut. Duhet solidaritet me njeri-tjetrin. Kemi të njëjtën situatë si më 1945 pas luftës së dytë botërore, ku nisën spastrimin e intelektualëve. Nuk është çudi të ndodhë sërish pas censurës. Shqipëria pritet të marrë presidencën e OSBE dhe kryeministri ecën me mashtrim dhe propagandë. Është një kambanë alarmi, nuk presim reagim të madh nga parlamenti apo institucionet ndërkombëtare”, tha ajo.
