Pak ditë më parë, 51-vjeçari Preng Gjini të cilit iu hodh makina në erë në Tiranë, nuk dha të dhëna të vlefshme për hetimin për sulmin ndaj tij. E ndërsa grupi hetimor beson se ngjarja ka ndodhur për qëllime hakmarrje. Preng Gjini, vëllai i të cilit u vra dy vite më parë në atentat në Rrëshen shprehet se nuk ka hasmëri me asnjë familje.
Por tashmë Prokuroria ka një të dyshuar për atentatin me lëndë shpërthyese që iu bë Preng Gjinit, mbrëmjen e 15 shtatorit në Tiranë. Gazetari Artan Hoxha, i ftuar në studion e “Abc News”, dha disa detaje të tjera lidhur me këtë ngjarje të rëndë.
Sa i përket të dyshuarit, për vendosjen e lëndës plasëse, Hoxha thotë se ekzekutorët nuk kanë lidhje direkt me urdhëruesit. “Është identifikuar një person që dyshohet të ketë lidhje të me grupin e ekzekutorëve dhe me porositësit…Ekzekutorët nuk kanë lidhje direkt me urdhëruesit.
Kanë zgjedhur persona që nuk i njihte. E dinë kush është, është shpallur në kërkim. Nuk e kanë ndaluar, por e kanë të qartë kush është. Ka dëshmi që e identifikojnë. Në momentin që kanë qenë afër lokalit, nuk ka folur shqip mirë, ka folur në italisht. Ka lëvizur pak para se objekti të çohet nga tavolina.”
Sa i përket lëndës plasëse të vendosur në automjetin që shpërtheu, gazetari Artan Hoxha thotë se në këtë rast nuk kemi të bëjmë me një minë me celular, por një minë të komanduar nga një rreze prej 100-150 metrash distancë.
“Ajo minë është vendosur atë ditë. Informacioni dhe mbikëqyrja ka qenë shumë e madhe. Krimi i organizuar është ky, e kanë ditur që lëviz me makinën e nipit kur vjen në Tiranë, rri në krahun e pasagjerit. Hetimet duken pozitive, kanë marrë një drejtim të duhur”.
Sipas tij, kemi të bëjmë me një specialist që ka dalë në qarkullim me këtë lloj aftësie, pasi nuk është aspak e lehtë që të montosh minat.
“Unë dyshoja që ishte minë me celular, por është një minë e aktivizuar me një pajisje tjetër. Që funksionon deri në 100-150 metra. Ai që ka aktivizuar minën ka qenë aty. Të jep mundësinë që e sheh lëvizjen dhe mban distancë që mos ta pësojë edhe vetë. Minë e përgatitur me një pajisje, të ngjashme me pultin e makinave. Pra kemi një specialist të ri që ka dalë në qarkullim me këtë lloj aftësie. Nuk është kollaj të montosh minat. Kjo ka bërë që autorët të japin një të dhënë të re për hetimin. Personi ka qenë në perimetër të afërt. Monitoruesit duhet të jenë të kujdesshëm që të zbulojnë detajin mes turmës”.
