Shqipëria u godit nga tërmeti në 26 nëntor, duke sjellë viktima e të plagosur. Bilanci ishte tragjik, 51 persona të vdekur dhe 913 të tjerë mbetën të plagosur. Komisioni Evropian është solidarizuar me vendin tonë, e ndërsa shqiptarët po kalojnë momente tejet të vështira. KE ka vendosur të dhurojë 15 milionë euro për Shqipërinë, për të ndihmuar në rindërtimin e mijëra ndërtesave të shembura nga tërmeti.
Ky lajm është bërë me dije nga shefja e KE, Ursula Von der Leyen, e cila ka deklaruar se dhurimi i kësaj shume, është vetëm hapi i parë i ndihmës.
“Solidaritet për Shqipërinë. Si hap i parë kemi vendosur të dislokojmë një shumë prej 15 milionë eurosh nga Fondi i Politikës së Fqinjësisë, në mënyrë të menjëhershme për të mbështetur popullin shqiptar, dhe gjithashtu kemi vendosur që të organizojmë një konferencë donatorësh dhe do t’i telefonoj kryeministrit Edi Rama sërish sot për ta informuar mbi këtë iniciativë”, tha Ursula Von der Leyen.
