Ambasada Amerikane ka reaguar për shtyrjen e zgjedhjeve të pjesshme në Kavajë. Deklarata e ambasadës tregon së mbështet vendimin e Ramës për t`u tërhequr por gjithashtu mbështet edhe të drejtën e shqiptarëve për të protestuar. Por me kë është ambasada amerikane në këtë situate të nxehtë në vend?
Deklarata e plotë e Ambasadës Amerikane
Ambasada e Shteteve të Bashkuara mbështet thirrjen e Kryeministrit për shtyrjen e zgjedhjeve bashkiake në Kavajë me qëllim që të ruhet përqendrimi i qeverisë dhe opozitës tek procesi i dialogut. Nxisim vazhdimin dhe përshpejtimin e procesit të dialogut sepse koha që mbetet për t’i zgjidhur çështjet me anë të negociatave përpara zgjedhjeve të 18 qershorit është e kufizuar.
Mbështesim të drejtat e shqiptarëve për të protestuar paqësisht dhe nxisim të gjitha palët që të tregojnë vetëpërmbajtje. Iu bëjmë thirrje të gjitha partive që të mos angazhohen në akte që mund të nxisnin dhunë, veçanërisht akte që ndikojnë në aftësinë e qytetarëve për të marrë pjesë në zgjedhje dhe për të ushtruar të drejtën e tyre për të votuar. Dhuna nuk ka vend në procesin demokratik.
