Italia është vendi më i goditur nga koronavirusi në Europë. Sipas raportimeve të fundit, numri i të vdekurve ka kaluar mbi 230 persona, ndërsa të infektuar janë 5.883. Italia e Veriut do të jetë në karantinë.
Kryeministri i Italisë ka thënë se të paktën 16 milion njerëz tani do të jenë në karantinë në rajonin e Lombardisë, dhe gjithashtu në 14 provinca deri në fillim të prillit. Vendimi i qeverisë u ndërmor për të përmirësuar situatën prej koronavirusit.
Kjo situatë ka sjellë ankth tek banorët. Në mediat italiane është publikuar letra e një djaloshi të vogël, i cili ka krijuar një vjershë për koronavirusin. Vjersha e tij është bërë virale.
I mituri teksa ka vijuar detyrat online që i ka dërguar mësuesja e tij, në vjershë ka shkruajtur se edhe pse virusi ka kurorë nuk është mbret, koronavirusi nuk do ta mposhtë Italinë.
Vargjet e vogëlushit:
“Mjafton një teshtimë dhe të gjithë ikin,
një puthje apo një përkëdhelje dhe drejt e në farmaci.
Ata ju quajnë një kurorë,
por nuk jeni mbret.
Jeni një virus mendjemadh që nuk vlen shumë.
Na thanë se në Sardenjë nuk do të vijë
dhe përkundrazi, ju jeni këtu!
Jemi pak të frikësuar, por ndoshta nuk e dini se ne, do të luftojmë derisa të zhdukeni.
Dhe pse nuk janë karnavalet, ne duhet të vëmë maskë.
Ne mendojmë për higjienën, i lajmë duart dhe gjithashtu përpiqemi të qëndrojmë larg.
Ne po bëjmë gjithçka që të mos kapemi, dhe ju, virus, nuk do të mund të na infektoni.
Italia jonë do të shpëtojë, dhe do të jetë një fund i lumtur”.
