Reperi amerikan Kanye West nuk tërhiqet nga gara për Shtëpinë e Bardhë.
Ai mbajti tubimin e parë zyrtar në fushatën presidenciale, të nisur në Karolinën e Jugut.
West gjatë fjalimit të tij nuk i mbajti dot lotët.
“Mamaja më shpëtoi jetën. Babai donte të më abortonte. Por mamaja më shpëtoi. Nuk do të ekzistonte Kanye West, vetëm sepse babai im ishte shumë i zënë. Për pak do vrisja vajzën time”, u shpreh reperi.
Këtë deklaratë West e zgjeroi më tej duke nënvizuar se bashkëshortja, Kim Kardashian, solli në jetë vogëlushen North edhe pse ai nuk e dëshironte një gjë të tillë.
Fansat e West kanë vënë në dyshim kandidaturën e tij të minutave të fundit për zgjedhjet presidenciale amerikane pasi dyshojnë se e gjithë kjo është një reklamë promocionale për një album këngësh që pritet të dalë së shpejti.
