I propozuari për kryeministër nga Lidhja Demokratike e Kosovës, Avdullah Hoti, ka folur në një konferencë për mediat pas mbledhjes së sotme të Kryesisë së LDK-së. Hoti ka deklaruar se si çështje e rëndësishme fillimisht do të jenë përballja me pandeminë dhe rimëkëmbja ekonomike. Sipas tij, pasojat ekonomike të kësaj pandemie, do të jenë të mëdha. Po kështu, kandidati për kryeministër ka shtuar se dialogu me Serbinë është gjithashtu një nga çështjet më të rëndësishme që do të përballen.
“Kjo qeveri po krijohet në rrethana specifike të kësaj pandemie, edhe për shkak të zhvillimeve politike që kanë ndodhur në muajt e fundit. Kemi hyrë në koalicion me marrëveshje të qartë, por na u desh të marrim vendim që të dalim nga ky koalicion për arsye që besoj që dihen”.
“Kam marrë besimin nga LDK-ja për të provuar që të ndërtojmë ekipin dhe partneritetin me partitë e tjera, për të ndërtuar qeverinë e re që sfidën e parë do ta ketë menaxhimin e pandemisë. Sfida e dytë do të jetë rimëkëmbja ekonomike ku besoj që kemi kompetencë të jashtëzakonshme për të dhënë kontribut për shoqërinë dhe shtetin e Kosovës. Krejt vlerësimet janë që pasojat ekonomike të kësaj pandemie do të jenë të mëdha dhe do të na duhet t’i mobilizojmë krejt resurset, të brendshme dhe të jashtme, që t’i dalim ballë pasojave ekonomike pas pandemisë”.
Ai ka treguar qëndrimin e tij për dialogun me Serbinë, duke thënë se kjo është çështja kryesore me të cilën do të përballet qeveria e re.
“Çështja e dialogut është çështje kryesore me të cilën do të ballafaqohemi në qeverinë e re. Me platformën që ka LDK-ja nga viti 2018 të miratuar në Këshillin e Përgjithshëm të LDK-së dhe me vendimin e Gjykatës Kushtetuese kur është shfuqizuar Ligji për Dialogun, janë vendosur kornizat se mbi cilat baza Kosova duhet ta kryejë procesin e dialogut”.
“Ne do t’i dalim ballë kësaj – dialogu do të udhëhiqet nga Qeveria e Kosovës në përputhje me aktgjykimin e Gjykatës Kushtetuese. Jam i bindur që do të krijojmë konsensus të nevojshëm brenda koalicionit qeverisës.
Ajo që është edhe më e rëndësishme, dhe besoj se këtu kemi përvojë të mirë si LDK, që do të kalojmë suazat e koalicionit qeverisës për të dalë edhe tek opozita, shoqëria civile, bota akademike dhe të gjithë në mënyrë që të përmbyllim këtë proces tepër të rëndësishëm për të konsoliduar shtetësinë e Kosovës në arenën ndërkombëtare”.
