Ngjarjet kriminale në Elbasan, kanë shkaktuar reagime të shumta, duke e lidhur atë me lidhjet e politikës me krimin. Një nga vrasjet më e fundit në qytetin e Elbasanit, i arrestuari i dyshuar është dhëndri i ish-kryebashkiakut Qazim Sejdini. Në lidhje me këtë çështje, ish-ministri i Drejtësisë, Ylli Manjani, i cili shquhet me statuset e tij thumbuese, ka hedhur kunjin e radhës.
“Elbasanin e sotëm e parashikoi Ben Blushi në romanin e tij “Kandidati”. Te një roman tjetër i tij, ka profeci të tjera…”, shkruan Manjani në një status në rrjetin social Facebook.
Në librin e tij “Kandidati”, politikani dhe shkrimtari Ben Blushi sillte një situatë politike, në një qytet ku zgjidhet kryetar Bashkie një kandidat i vdekur, i cili ishte ndarë nga jeta në prag të fushatës elektorale.
Blushi me mjeshtërinë e penës së tij, tregon sesi mund të zgjidhet kryetar Bashkie një kandidat i vdekur, si mund të zhvillohej nje fushatë elektorale, kush ishte vetë kandidati dhe familjarët e tij.
Në atë kohë nga mediat u interpretua se libri i Blushit si personazh kishte kryebashkiakun e Elbasanit, Qazim Sejdini, qytet ku Blushi kishte udhëhequr fushatën elektorale të 2013 për Partinë Socialiste.
Siç duket, “Kandidati” i Ben Blushit është libri më aktual dhe po jetohet në politikën shqiptare.
