Ministri i Drejtësisë, Ulsi Manja, ka hedhur poshtë raportimet nga mediat britanike se në Shqipëri do të instalohet një kamp refugjatësh. Manja tha për mediat se vendi ynë nuk do të jetë asnjëherë një vend strehimi për refugjatët. Ai bëri me dije se sot është kaluar me vendim qeverie marrëveshja e bashkëpunimit me Mbretërinë e Bashkuar, për transferimin e personave të dënuar. Manja deklaroi se kjo nuk ka lidhje me atë që është publikuar në mediat britanike, se në Shqipëri do të ndërtohet një kamp për refugjatët.
“Sot kaluam në KM një marrëveshje bashkëpunimi me Mbretërinë e Bashkuar për transferimin e personave të dënuar. Eliminon pengesat që ka ndërmjet dy sistemeve ligjore.
Ka pasur sot spekulime që kjo një marrëveshje në fakt përfshin të gjithë personat që janë refugjatë atje. Por në fakt është spekulim mediatik. Kjo marrëveshje lidhet tërësisht dhe ka të bëjë për bashkëpunimin në fushën e çështjeve penale, dhe jo me ato kategori hallexhinjsh për tu trajtuar si kamp refugjatësh.
Shqipëria nuk e ka menduar në asnjë moment që të trajtojë emigrantë, që s’kanë asnjë problem me këto vende. Shqipëria nuk ka qenë duke biseduar dhe as nuk do të bisedojë për refugjatë, që kanë lënë vendet e tyre për çështje tërësisht ekonomike”, tha Manja.
