Sekretari për Çështjet Zgjedhore në PD, Ivi Kaso akuzon kryeministrin Rama falsifikimin e pjesëmarrjes në votime.
Në një deklaratë për mediat, Kaso deklaroi se numri përfundimtar i votuesve është 15% dhe paralajmëroi anëtarët e KQZ-së se do përgjigjen për çdo mashtrim që kanë bërë.
“Nga monitorimi i të gjitha qendrave të votimit deri në mbylljen e tyre në orën 19:00, ka rezultuar se pjesëmarrja faktike në rang vendi është 15%. PD paralajmëron kamikazët politikë të KQZ-së, se ata do të mbajnë përgjegjësi për falsifikimin që kanë kryer”, u shpreh ai.
Deklarata e plotë:
Operacioni i drejtuar nga Edi Rama për falsifikimin e pjesëmarrjes në votimet e tij një-partiake dhe të paligjshme po vazhdon deri në fund. KQZ-ja e paligjshme, me 4 anëtarë vetëm nga PS mashtroi shqiptarët dhe partnerët për numrin e vërtetë të atyre që kanë votuar, gjatë gjithë ditës e deri në fund të farsës.
Nga monitorimi i të gjitha qendrave të votimit deri në mbylljen e tyre në orën 19:00, ka rezultuar se pjesëmarrja faktike në rang vendi është 15%. PD paralajmëron kamikazët politikë të KQZ-së, se ata do të mbajnë përgjegjësi për falsifikimin që kanë kryer.
Me gjithë shkeljet e panumërta të denoncuara nga mediat dhe qytetarët, që nga votuesit që votojnë disa herë, tek blerja e votave, tek mbushja e kutive, tek komisionet e votimit me 1 anëtar, që nga votimi në grup e deri te votimi i hapur, tek kërcënimet dhe shantazhet e zyrtarëve dhe grupeve kriminale ndaj votuesve e deri te mbushja fiktive e listës së votuesve me emrat e emigrantëve.
Edhe pse në këtë farsë ai vetë kandidon, vetë voton dhe vetë numëron. Paniku i Edi Ramës nga braktisja dhe refuzimi popullor e ka shtyrë drejt manipulimit flagrant të numrit të pjesëmarrësve në këtë farsë. As mbushja e kutive që po ndodh në këto momente dhe as manipulimi i numrit të votuesve, nuk e shpëtojnë Edi Ramën nga ajo që e dimë të gjithë tashmë, shqiptarët e kanë refuzuar.
