Lugina e Preshevës e ka të garantuar të drejtën e bashkëpunimit me Prishtinën e Tiranën dhe këtë të drejtë askush nuk mund t’ia marrë, thotë deputeti shqiptar në Parlamentin serb, Shaip Kamberi.
“Nuk është hera e parë që në Serbi ngrihen tensione e shtrëngata kur bëhet fjalë për shqiptarët dhe të drejtat e tyre. Bëhen përpjekje që artificialisht të krijohet problemi vetëm e vetëm që shqiptarët dhe kërkesat e tyre legjitime ndaj Beogradit të diskreditohen”, thekson ai për të përditshmen “Politika” të Beogradit.
“Të aludosh se kryetar i Jonuz Musliut( Kryetari i Këshillit Kombëtar Shqiptar dhe kryetar i Kuvendit të Bujanocit), është Edi Rama, është njëlloj sikur të thuash se myslimanët dhe ata që protestojnë në Beograd, nuk e konsiderojnë Aleksandar Vuçiçin kryetar të vetin”, ka theksuar Kamberi.
Duke folur mbi prioritetet e shqiptarëve të Luginës së Preshevës, ai shtoi se qëllim primar është bindja e pushtetit në Beograd për vazhdimin e dialogut për “Planin në shtatë pika”, i cili, sipas tij është shumë i rëndësishëm për stabilitetin në rajon.
