Mediat greke bëjnë me dije se është kapur 1.2 ton drogë në Athinë, e cila kishte ndjekur itinerarin Turqi-Shqipëri-Greqi.
Bëhet me dije se operacioni për kapjen e kësaj sasie droge është zhvilluar ditën e shtunë, por është publikuar vetëm ditën e sotme.
Rulota e ndaluar në Athinë ka kaluar pikën kufitare shqiptare të Qafë-Botës dhe më pas është futur në Greqi. Policia ka arrestuar dy drejtuesit e rulotës, përkatësisht burrë e grua.
Identiteti dhe kombësia e tyre nuk është bërë e ditur akoma, ndërsa 1 tjetër person është shpallur në kërkim. Gjatë kontrollit është zbuluar sasia e madhe e drogës, përkatësisht 1 ton e 145 kg marijuanë, 4 kg e 68 gram hashash çokollatë, si dhe 918 gram vaj hashashi.
Raportohet se vlera e drogës së kapur shkon në 1 milionë e 730 mijë euro.
