Dy persona janë arrestuar ditën e sotme nga policia në Pogradec.
Bëhet me dije se një prej të arrestuarve i cili ishte me detyrë doganier ka lejuar kalimin e mallrave të dyshuara kontrabandë, për të cilat paguhet akcizë. Kështu kanë rënë në prangat e policisë shtetasit A.T., 47 vjeç, banues në Pogradec dhe F.D., 60 vjeç, banues në Tiranë, me detyrë doganier në Doganën e Tushemishtit.
Gjatë kontrolleve të ushtruara nga ana e Policisë, në lagjen nr.1, Pogradec, në mjetin tip “Benz” në pronësi të shtetasit A.T., iu gjet dhe sekuestrua një sasi e konsiderueshme mallrash të dyshuara kontrabandë (fruta ta thata). I dyshuari i ka kaluar këto mallra nga Pika e Kalimit Kufitar Tushemisht, ku doganieri F.D., dyshohet se ka shpërdoruar detyrën duke mos kryer procedurën e zhdoganimit.
Po kështu u proceduan penalisht në gjendje të lirë edhe 2 shtetas të tjerë të cilët tregtonin mallra pa pullë fiskale. Ata u kapën duke tregtuar sasi duhani të grirë, mall i dyshuar kontrabandë, i papajisur me pullë fiskale.
