Pas vendimit të qeverisë për ndalimin e aktiviteteve të klubeve të natës, diskove, lunge-bareve apo çdo lloj shërbimi të kësaj natyre, shoqëruar dhe me ndalimin e muzikës pas orës 20:00, solli shumë pakënaqësi dhe protesta.
Në lidhje me këtë situatë, drejtori i Urgjencës Kombëtare, Skënder Brataj, në një intervistë për “Ora News” tha se duhet ishin marrë masat për të mos u mbyllur. Sipas tij, të rinjtë ndonëse më pak të riskuar nga koronavirusi, janë një burim i madh i transmetimit të virusit.
“Pikat e grumbullimit më të madh ishin këto aktivitete, në të cilat ishte mosha e re, të rinjtë.
Këta e respektojnë më më pak rregullat, por janë burim i madh i transmetimit të infeksionit. Masat merren për të mbrojtur shëndetin, nuk ka rrugë alternative.
Virusi është këtu. Duhen marrë masat për të mos u mbyllur. Besoj se me këto masa dhe bërjen të detyrueshme të maskës në ambientet e mbyllura, brenda 3-4 javësh mund të ketë një ulje të të infektuarve”, tha ai.
Brataj shtoi më tej se lirimi i masave ka sjellë edhe shtim të infeksionit. “Me lirimin e masave, pozitiviteti është rritur nga mosrespektimi i rregullave. Sa më shumë rritet numri i të infektuarve, një 30% do të shndërrohet në pacientë, 10-12% do shtrohen në spital”.
